Drejtuesit e Lajpcigut kanë gjetur në Francë zëvendësuesin e Joshko Gvardiollit, i cili u shit te Man. Siti për 90 mln euro. Duke u kthyer në mbrojtësin më të shtrenjtë në histori. Vendin e lënë bosh nga 21-vjeçari kroat, do e mbulojë Kastello Lukeba. Francezi me origjinë nga Angola ka dalë nga Akademia e Lionit. Teksa prej verës së vitit 2021 luan me ekipin e parë.
Klubi francez do të përfitojë 34 mln euro + bonuse nga shitja e qendërmbrojtësit në Bundesliga. Lukeba ka firmosur një kontratë 5-vjeçare me Lajpcigun, ndërkohë që Lioni ka mbajtur 20% të kartonit të tij. Lukeba është pjesë e kombëtares U21 të Francës, fanellën e së cilës e ka veshur 10 herë deri tani. Tani është gati të tregojë aftësitë e tij në një nga skuadrat më të forta në Gjermani.
Në një klub që punon në perfeksion me të rinjtë, ku ka mundësinë të punojë i qetë, të përmirësohet dhe të shitet në të ardhmen diku tjetër. Lukeba do të garojë në grupet e Ligës së Kampionëve me skuadrën e Marko Rose.