Pa dyshim, Xhud Belingam është njeriu i momentit në Spanjë dhe në përgjithësi në të gjithë Europën. Ndikim i jashtëzakonshëm për mesfushorin e Real Madridit në aventurën e tij të re pas Dortmundit.
Anglezi është tashmë forca shtytëse e skuadrës madrilene, e cila këtë fundjavë do të sfidojë Barcelonën e Çavit në “El Clasico”-n e shumëpritur, ndeshjen më të rëndësishme në Spanjë.
Për këtë rast, mesfushori anglez i Real Madrid ka folur për “RTVE”, duke analizuar se cila mund të jetë ndeshja e tij dhe ka shpjeguar momentin e tij personal.
“Ndihem mirë pas ndeshjes kundër Bragas në Ligën e Kampionëve. E di ndikimin që ka “El Clasico” tek tifozët, mediat dhe futbolli në përgjithësi. Ndihem përgjegjës ndaj klubit dhe tifozëve për marrjen e tre pikëve. Ne kemi një ekip shumë cilësor dhe nëse bëjmë gjithçka mundemi, parashikoj fitore për ekipin tim, jam shumë i emocionuar dhe mezi e pres këtë ndeshje.
Kemi respekt të madh për këtë kundërshtar. Kjo ndeshje më intereson mua personalisht. Do të argëtohem shumë”, ka përfunduar Belingami gjatë intervistës për “RTVE”.