Në seancën e zhvilluar, ish-kryeministri Berisha nuk ishte i pranishëm, pasi ai ka deklaruar më parë se “Kushtetuta nuk lejon kufizimin e lirisë së deputetit në asnjë lloj forme, pa aprovimin e parlamentit”
Gjykata e Posaçme e Shkallës së Parë për Korrupsionin dhe Krimin e Organizuar e Shqipërisë ka lënë në fuqi masën “detyrim për t’u paraqitur në policinë gjyqësore” dhe “ndalim i daljes jashtë shtetit”, për ish-kryeministrin e Shqipërisë, Sali Berisha, i dyshuar sipas autoriteteve për korrupsion, transmeton Anadolu.
Në seancën e zhvilluar sot, ish-kryeministri Berisha nuk ishte i pranishëm, pasi ai ka deklaruar më parë se “Kushtetuta nuk lejon kufizimin e lirisë së deputetit në asnjë lloj forme, pa aprovimin e parlamentit”.
Në një njoftim për mediat të Gjykatës së Posaçme të Shkallës së Parë për Korrupsionin dhe Krimin e Organizuar thuhet se gjykata ka vendosur “vazhdimin e masës së sigurimit personal me karakter shtrëngues ‘detyrim për t’u paraqitur në policinë gjyqësore’ ndaj shtetasit nën hetim Sali Berisha”.
Sipas gjykatës, Berisha urdhërohet të mos largohet nga territori i Shqipërisë pa autorizimin e gjykatës.
Prokuroria e Posaçme kundër Korrupsionit dhe Krimit të Organizuar Tiranë (SPAK) njoftoi më 22 tetor se ndaj Berishës është vendosur masa “detyrim për t’u paraqitur në policinë gjyqësore” dhe “ndalim i daljes jashtë shtetit”, ndërsa dhëndri i Berishës, Jamarbër Malltezi, është arrestuar për korrupsion dhe pastrim parash.
Sipas SPAK-ut, objekti i hetimit për çështjen në fjalë, janë veprimet e kryera nga funksionarë të lartë shtetërorë dhe persona të tjerë, për privatizimin e terreneve dhe objekteve sportive të “Klubit të Futbollit Partizani” dhe “Klubit Shumësportesh Partizani” në Tiranë.
Sipas autoriteteve, nga ana e ish-kryeministrit Berisha, në cilësinë e tij si Kryeministër i Shqipërisë, janë kryer veprime aktive në vendosjen në dispozicion të dhëndrit të tij Malltezi, të strukturave të ndryshme të administratës shtetërore për realizimin e procesit të privatizimit të pronës shtetërore.
Kujtojmë se ish-kryeministri Berisha është i shpallur më parë person “non grata” nga Shtetet e Bashkuara të Amerikës (ShBA) dhe Britania e Madhe.
Sali Berisha ka mbajtur postin e presidentit të Shqipërisë në vitet 1992-1997 dhe postin e kryeministrit në vitet 2005-2013, ndërsa në zgjedhjet e 25 prillit të vitit 2021 ai u zgjodh deputet nga partia opozitare, Partia Demokratike e Shqipërisë, ndërsa aktualisht nga Kuvendi i Shqipërisë ai njihet zyrtarisht si deputet jashtë grupeve parlamentare, për shkak të përplasjeve të fundit brenda Partisë Demokratike.
