Në kuadër të projektit “Eco Patrol – Platformë Digjitale për Raportim dhe Reagim ndaj Ndotjes në Kohë Reale”, të financuar nga Fondi Europian për Ballkanin, mbajtëm takimin e parë informues për prezantimin e projektit dhe platformës digjitale EcoPatrol.mk.
Projekti udhëhiqet nga Bashkësia e Ekologëve “Natyra” – Strugë, në partneritet me Grupin e Vëzhguesve “Krste Jon” – Strugë.
Në takimin informues morën pjesë drejtori i Ndërmarrjes Publike Komunale të Strugës, z. Resul Çollaku, përfaqësues të komunave të Strugës dhe Vevçanit, inspektoratit komunal të mjedisit, ndërmarrjeve publike komunale, si dhe qytetarë, organizata të shoqërisë civile, studentë, nxënës dhe arsimtarë.
Gjatë takimit prezantuam projektin, qëllimet e tij dhe mënyrën se si funksionon platforma EcoPatrol.mk, përmes së cilës qytetarët mund të raportojnë ndotjen dhe problemet mjedisore, duke ndihmuar që ato të evidentohen dhe të trajtohen nga institucionet përgjegjëse.
Diskutimi ishte i hapur dhe mjaft aktiv. Pjesëmarrësit ndanë ide dhe sugjerime konkrete për përmirësimin e platformës, në mënyrë që ajo të jetë sa më funksionale dhe e lehtë për t’u përdorur nga të gjithë. Ky bashkëpunim është i rëndësishëm që EcoPatrol të bëhet një mjet praktik për qytetarët dhe institucionet.
Takimi shërbeu edhe për t’i njohur qytetarët më nga afër me platformën dhe mundësinë që ajo u ofron për të kontribuar drejtpërdrejt në mbrojtjen e mjedisit. Pjesëmarrësit shprehën gatishmërinë për ta përdorur platformën dhe për t’u bërë pjesë e përpjekjeve për një Strugë dhe Vevçan më të pastër.
Besojmë se ndryshimi fillon kur qytetarët dhe institucionet bashkëpunojnë. Me EcoPatrol, synojmë që raportimi i ndotjes të jetë më i lehtë, reagimi më i shpejtë dhe kujdesi për mjedisin një përgjegjësi e përbashkët.
Raporto ndotjen, bëhu pjesë e ndryshimit.
